06/07/2013
https://www.facebook.com/FrontierIns
Bekyk dié lewenspolis maar van alle kante
Nuwe Outsurance-polis het talle nadele
HELENA WASSERMAN
Vrydag 05 Julie 2013
Grahamstad. – “Dis gratis versekering!” sê die Outsurance-verkoopsman aan die ander kant van die telefoon. En dié groep se nuwe produk, wat tans wyd geadverteer word, klínk goed.
As jy lewensversekering by Outsurance uitneem, word al jou premies ná 15 jaar in kontant aan jou terugbetaal indien jy nie eis nie. Daar is geen mediese ondersoek nie.
Die volle voordeel word aan jou uitbetaal as jy met ’n terminale siekte gediagnoseer word of deur ’n permanente liggaamlike gestremdheid (soos die verlies van ’n ledemaat) getref word. As nie-terminale kanker by jou gediagnoseer word, kry jy dadelik 10% van die voordeel.
Elke jaar styg jou premies outomaties met 6% en die voordeel wat uitbetaal word, styg met 4%.
Dus: As jy sterf of siek word, kry jy ’n uitbetaling. En as die noodlot jou nié tref nie, kry jy ’n uitbetaling – al die premies wat jy 15 jaar lank inbetaal het. Nie sleg nie?
Hokaai.
Outsurance sal nie binne die eerste jaar die volle bedrag sal uitbetaal as jy sterf nie. Jy kan ook nie enige gesondheidsverwante eise indien in die eerste ses maande nie.
Vir lewensdekking van R500 000 sal ’n nie-rokende 40-jarige in die omgewing van R484 ’n maand vir Outsurance se Essential Life-polis betaal. ’n Soortgelyke polis van ’n mededinger soos Altrisk gaan jou egter slegs R110 kos – R374 minder as die Outsurance-polis, sê Greg Sneddon,’n geregistreerde finansiële beplanner van The Financial Coach in Kaapstad.
Sneddon bereken dat die Outsurance-polishouer kan verwag om ná 15 jaar R134 000 terug te kry – mits daar geen eise is nie. As jy sou besluit om eerder die goedkoper polis vir R110 te koop, en die verskil (R374) in ’n gebalanseerde fonds belê (teen ’n reële groeikoers van 5% per jaar), sal jy ná 15 jaar R211 000 hê. Én jy kon in daardie tyd eis.
Maar Ernst Gouws, hoof van Outsurance, sê die produkte kan nie vergelyk word nie. Hy sê polisse van versekeraars soos Liberty, Old Mutual en Sanlam sal noodwendig goedkoper wees, want die persoon moet eers ’n rits mediese toetse aflê.
Die Outsurance Essential Life-produk is nader aan kredietlewensdekking – daar word slegs enkele vrae gevra en geen mediese toetse nie. Dit is heeltemal ’n ander mark, sê Gouws. Outsurance het ook ’n ander lewensversekeringsproduk wat goedkoper is.
Sneddon sê egter ook dat die oorgrote meerderheid van polishouers nie 15 jaar lank ’n polis hou nie. Volgens hom het Suid-Afrikaners ’n paar jaar gelede slegs vir gemiddeld sewe jaar dieselfde lewenspolis gehou. “Die kans dat jy dieselfde polis 15 jaar lank gaan hê, is bitter klein.”
Lucienne Fild, ’n woordvoerder van die vereniging vir spaar en belegging in Suid-Afrika (Asisa), sê daar is nie tans syfers beskikbaar oor hoe lank ’n polishouer gemiddeld ’n lewenspolis hou nie.
Syfers van Asisa wys egter dat meer as 6,5 miljoen polisse in 2012 gestaak is. Meer as 3,77 miljoen van dié polisse is binne die eerste jaar gestaak. Daar was ook ’n skerp styging (16%) in die aantal polisse wat gestaak is.
Gouws sê die Outsurance-produk wil juis dié probleem oplos. Daar is sommige makelaars wat kliënte aanmoedig om hul polis elke jaar te verander sodat hulle kommissie kan verdien, sê hy. (Die kommissie word in die eerste paar jaar uitbetaal.) Outsurance bied juis ’n aansporing sodat mense lank bly – “en teen ongelooflik goeie waarde”, volgens Gouws.
Een van die ander redes waarom polisse egter gestaak word, is dat hulle met nuwe, goedkoper produkte vervang word.
“Met gevorderde mediese tegnologie, leef mense ál langer. Versekeraars en aktuarisse pas hul risikotabelle gedurig aan. Versekering word goedkoper en nuwe produkte word bekend gestel,” sê Nick Dekker, ’n finansiële beplanner van Ultima Finansiële Beplanners in Pretoria.
“Dié nuwe Outsurance-produk is byvoorbeeld goedkoper as hul eie oorspronklike een wat maar ’n paar jaar oud is – die telefoonkonsultant het dit bevestig sonder dat ek die inligting gevra het.”
Gouws waarsku egter dat polisse nie noodwendig goedkoper word nie. As jy op 50-jarige ouderdom om ’n lewenspolis aansoek doen, is die risiko groter en gaan die premies hoër wees as op 40.
Nog iets waardeur Sneddon nie beïndruk is nie, is dat Outsurance nie binne die eerste jaar die volle bedrag sal uitbetaal as jy sterf nie. “Met ’n normale lewenspolis word jy dadelik gedek.”
Jy kan ook nie enige gesondheidsverwante eise indien in die eerste ses maande nie. “Dit lyk vir my al wat Outsurance Life gedoen het, is om ’n baie ou manier van lewensversekering – die universele lewenspolis of die uitkeerpolis met dekking – te neem en weer nuut op te dis. Ek sou nie daaraan raak nie,” sê Sneddon.
As jy besluit om deur ’n adviseur lewensversekering te koop, het jy toegang tot advies – ook oor ander aspekte van jou finansies, sê Dekker. Outsurance is ’n regstreekse versekeraar.
We provide advice and intermediary services in respect of short-term, investment advice and advice in respect of long term assurance.
FSP # 15459
