05/18/2026
Èske m PLEDGE deja?
Mwen panse li enpòtan pou yon moun reflechi byen avan w manifeste enterè nan nenpòt pwojè, sitou yon pwojè konsa ki gwonèg. Sa pa vle di mwen kont pwojè a oubyen mwen pa vle sipòte Ayisyen. Okontrè, mwen toujou kwè diaspora a kapab fè gwo bagay ansanm. Men emosyon pa dwe ranplase analiz.
Premye kestyon mwen poze tèt mwen se: èske se yon sèl moun ki dèyè pwojè a, oubyen èske gen yon gwoup pwofesyonèl serye ak eksperyans ki kanpe dèyè l? Pwojè sa mande anpil ekspètiz, anpil kapital, anpil compliance, ak yon estrikti trè solid. Se pa sèlman yon kestyon bon volonte oubyen popilarite.
Dezyèm bagay la, mwen fè diferans ant sipòte yon pwojè ak envesti ladan. Si se sipò, mwen Dakò sipòte, mwen pa gen pwoblèm. Men si yon pwojè ap antre nan lojik envestisman, menm si n ap pale de “pledge”, ki ta enterè mwen manifeste, mwen panse li nòmal pou ta gen yon plan envestisman serye, yon vizyon klè, ak kijan pwojè a pral fonksyone nan reyalite. Lè yon moun manifeste enterè l, sa montre li ouvè pou patisipe pita. Se poutèt sa kestyon sa enpòtan.
Twazyèmman, li enpòtan pou n gade estrikti ak kapasite reyèl ki pral mete an plas. Ki ekip la? Ki eksperyans yo genyen? Ki plan operasyon an? Ki mwayen finansye? Ki etap ki prevwa? Paske yon gwo vizyon san estrikti solid ka fasilman tounen yon gwo desepsyon.
Sipò ak fyète pa dwe anpeche refleksyon ak responsabilite.
