27/08/2026
नयाँ नियमावलीअनुसार बोलपत्र कागजात संशोधन गर्न PPMO को निर्देशन
काठमाडौं । सार्वजनिक खरिद अनुगमन कार्यालय (PPMO) ले सार्वजनिक खरिद (सोह्रौँ संशोधन) नियमावली, २०८३ कार्यान्वयनका लागि सबै सार्वजनिक निकायलाई बोलपत्र सम्बन्धी कागजात तथा खरिद कारबाही संशोधन गरी अघि बढाउन निर्देशन दिएको छ।
सोह्रौँ संशोधन नियमावली २०८३ भदौ ३ गते नेपाल राजपत्रमा प्रकाशित भई लागू भइसकेको जनाउँदै PPMO ले नमूना बोलपत्र सम्बन्धी कागजात परिमार्जन गर्ने काम भइरहेको जानकारी दिएको छ।
PPMO ले नयाँ नमूना बोलपत्र कागजात जारी नभएसम्म सार्वजनिक निकायले आफैंले तयार गर्ने बोलपत्र कागजातमा संशोधित नियमावलीअनुसार आवश्यक व्यवस्था मिलाउनुपर्ने जनाएको छ। साथै, बोलपत्र आह्वान भइसकेको तर प्रस्ताव दाखिला गर्ने म्याद बाँकी रहेका खरिदमा समेत नियमावलीअनुसार कागजात संशोधन गरी प्रक्रिया सञ्चालन गर्न भनिएको छ।
सूचना जारी हुनुअघि नै मूल्याङ्कन चरणमा पुगेका खरिद कारबाहीमा भने सार्वजनिक खरिद ऐन, २०६३ को दफा १०(४), दफा २५(५) तथा २५(५ख) र सार्वजनिक खरिद नियमावली, २०६४ को नियम ६१(४) बमोजिम कारबाही हुने PPMO ले स्पष्ट पारेको छ।
यस निर्देशनसँगै सार्वजनिक निकाय, निर्माण व्यवसायी तथा परामर्शदाताले जारी र नयाँ बोलपत्रमा सोह्रौँ संशोधनबाट भएका परिवर्तनहरू ध्यानपूर्वक लागू गर्नुपर्ने भएको छ।
