14/03/2023
اليوم من أهم البيانات الي راح تصدر وتأثر على سعر الذهب العالمي هو
مؤشر أسعار المستهلكين الامريكي الي يختصر ب CPI
راح يصدر الساعة ب 3:30 م بتوقيت بغداد
زين هو شنو مؤشر اسعار المستهلكين CPI ؟
هو معناه اسعار المواد صعدت لو نزلت ( الغذائية , النقل , الايجارات ,مصاريف الطاقة .. الخ )
يعني قصدك التصخم ؟
عليك نور ... الي سولفنا عليها هوايه بمنشورات سابقة وهوايه حجينا شلون انه التضخم يأثر على اسعار الذهب
اذا انت مشتري ذهب او تريد تشتري لغرض الاستثمار كلش مهم اتابع الخبر اذا اجه الخبر اقل من المتوقع الي هو 6.0 % يعني الذهب راح يصعد
واذا اجه اعلئ او مساوي للقراء السابقة 6.4% يعني الذهب راح ينزل
السابق كان 6.4%
المتوقع 6.0%
زين واذا اجه بين 6.0 و 6.4 على الاغلب سعر الذهب راح يتذبذب بس عموما راح يصعد لان يعتبر التضخم اقل من الشهر الماضي
زين نرجع نسئل السوال الازلي ليش التضخم يأثر على سعر الذهب ؟
امبين عليك ما قاري المنشورات السابقة ! على العموم راح اعيده لان بالعادة افائدة
لان الهدف الرئيسي حاليا للبنك الفيدرالي الامريكي هو محاربة التضخم لذالك بيان اليوم كلش مهم اذا التضخم اجه عالي يعني الفيدرالي راح يشدد بمحاربة التضخم
زين شلون يحارب التضخم ؟ احنا سولفنا قبل انه احد الاسلحة الرئيسية للبنك الفيدرالي بمحاربة التضخم هو زيادة سعر الفائدة واذا الفيدرالي شاف التضخم عالي يعني بالاجتماع الجاي راح يصعد سعر الفائدة اكثر واذا صعد سعر الفائدة يعني الذهب راح ينزل سعره
احفظ هاي المعادلة
التضخم عالي ----> سعر الفائدة عالي ------> الذهب ينزل سعره
التضخم قليل ---->سعر الفائدة قليل -------> الذهب يصعد سعره
أذا ما تعرف شنو التضخم شوف المنشور السابق بالصفحة
#الدولار
#الذهب
#التضخم
#بيشالذهب
