21/05/2026
📢 ცვლილება "გაცვლის (ბარტერული) ოპერაციის" საჯარო გადაწყვეტილებაში 🏚️
🟢 „გაცვლის ბარტერული ოპერაციის დღგ-ის დაბეგვრის თაობაზე, ამ ოპერაციის ფარგლებში უძრავი ნივთის მიწოდებისას“ საჯარო გადაწყვეტილებაში შევიდა ცვლილება, რომლითაც დაზუსტდა ოპერაციის დღგ-ით დასაბეგრი თანხა ისეთ შემთხვევებში როცა ბარტერული ოპერაციის ფარგლებში ადგილი აქვს, როგორც ფულად ასევე, არაფულად ანაზღაურებას.
➡️ აქამდე მოქმედი რედაქციით ისეთ შემთხვევებში როცა ადგილი ჰქონდა, როგორც ფულად ასევე, არაფულად ანაზღაურებას ოპერაციის დღგ-ით დასაბაგრი თანხა განისაზღვრებოდა მხოლოდ შემდგენი პრინციპით:
მაგალითად, თუ ფიზიკური პირი საწარმოს საკუთრებაში გადასცემს მიწის ნაკვეთს, რისთვისაც ანაზღაურება ხორციელდება, ნაწილობრივ, ამავე მიწის ნაკვეთზე აშენებული შენობა-ნაგებობის მიწოდებით, ხოლო ნაწილობრივ - ფულადი სახით, საწარმოს მიერ აღნიშნული ოპერაციის დღგ-ით დასაბეგრი თანხა განისაზღვრება საწარმოს მიერ მიღებული მიწის ნაკვეთის საბაზრო ფასით, დღგ-ის გარეშე, ფულადი სახით ანაზღაურებული თანხის გამოკლებით.
❓ ამგვარი მიდგომა იწვევდა გაურკვევლობებს ისეთ შემთხვევებზე, როცა საწარმოს მიერ მიწის ნაკვეთის მესაკუთრისთვის ანაზღაურებული თანხა უტოლდებოდა ან აღემატებოდა მიწის ნაკვეთის საბაზრო ფასს. ამ შემთხვევაში ოპერაციის დღგ-ით დასაბეგრი თანხა უტოლდებოდა ნულს.
❗ ❗ ❗ საჯარო გადაწყვეტილებაში შეტანილი ცვლილებით, ოპერაციის დღგ-ით დაბეგვრის მიზნებისთვის შემოვიდა ცნება „მხარეთა შორის შეთანხმებული გარიგების ფასი“.
✅ ახალი მიდგომით დასაბეგრი ბაზის განსაზღვრის პრინციპი შემდეგია: „თუ შერეული (ფულადი და არაფულადი) ანაზღაურების პირობებში კომპეტენტური შემფასებლის/ექსპერტის დასკვნის შესაბამისად, პირის მიერ მიღებული ქონების საბაზრო ფასი ნაკლებია გარიგების ფასზე, დღგ-ით დასაბეგრი თანხის განსაზღვრისას გამოიყენება მხარეთა შორის შეთანხმებული გარიგების ფასი“.
მაგალითად, მხარეთა შორის შეთანხმებული გარიგების ფასი შეადგენს 1 100 000 ლარს, საიდანაც ფულადი კომპონენტი 700 000 ლარია. კომპეტენტური შემფასებლის დასკვნის მიხედვით, მიღებული მიწის ნაკვეთის საბაზრო ღირებულება 600 000 ლარით განისაზღვრა.
ვინაიდან მხარეთა შორის შეთანხმებული გარიგების ფასი აღემატება ექსპერტის მიერ დადგენილ მიწის ნაკვეთის საბაზრო ფასს, დღგ-ით დასაბეგრი თანხის განსაზღვრისას, საფუძვლად შეთანხმებული ფასი აიღება.
შესაბამისად, განსახილველ შემთხვევაში, საწარმოს მიერ მიწოდებული უძრავი ქონების დღგ-ით დასაბეგრი თანხა შეადგენს 400 000 ლარს (გარიგების ფასს (1 100 000 ლარს) გამოკლებული გადახდილი ფულადი ანაზღაურება (700 000 ლარი)). “.
