https://www.youtube.com/@mubader-EG

منصة مُبادر التعليمية - محاسبة وأكثر, Cairo (2026)

23/04/2025

💡 إزاي تقرأ القوائم المالية لأي شركة؟
الموضوع مش مجرد أرقام… كل رقم بيحكي حكاية!

📌 لو عايز تبص على الوضع المالي الحقيقي لأي شركة، لازم تبدأ من قراءة القوائم المالية، وده ترتيب بسيط ممكن تمشي عليه:

🔹 1. قائمة المركز المالي (Balance Sheet):
هي صورة ثابتة للمركز المالي للشركة في لحظة معينة.
فيها هتشوف:
الأصول = الالتزامات + حقوق الملكية
يعني الشركة بتمتلك إيه؟ وعليها التزامات قد إيه؟ وصافي حقوق الملاك كام؟

🔹 2. قائمة الدخل (Income Statement):
هنا بنقيس أداء الشركة خلال فترة زمنية معينة.
بتوضحلك:
الإيرادات - المصروفات = صافي الربح (أو الخسارة)
ودي اللي بنشوف فيها ربحية الشركة.

🔹 3. قائمة التدفقات النقدية (Cash Flow):
دي بتوريلك الحركة الفعلية للنقد داخل وخارج الشركة.
مقسومة لـ:
✅ تشغيل
✅ استثمار
✅ تمويل
ودي مهمة جدًا علشان نعرف الشركة فعلاً معاها كاش ولا الربح بس على الورق.

🔹 4. قائمة التغير في حقوق الملكية (Equity Statement):
بتوضح أي تغيير حصل في حقوق الملاك زي:
رأس المال – التوزيعات – صافي الربح – أي إضافات أو سحوبات.

📌 نصيحة سريعة:
ابدأ دايمًا بقائمة التدفقات النقدية، لأنها هتقولك الشركة عندها كاش ولا لأ. بعدين شوف الربحية من قائمة الدخل، وبعد كده حلل موقف الأصول والالتزامات من قائمة المركز المالي.

🤔 سؤال ليك:
لو قدامك شركتين، واحدة بتحقق أرباح بس التدفقات النقدية عندها بالسالب، والتانية أرباحها أقل بس معاها كاش كتير... تختار تشتغل مع مين؟ وليه؟
اكتبلي رأيك في كومنت 👇

#محاسبة

16/04/2025

✅ التكاليف المباشرة (Direct Costs)
هي التكاليف التي يمكن تحميلها مباشرة على مشروع معين، ومرتبطة بشكل مباشر بتنفيذ أعماله. ودي من أهم التكاليف اللي بيتم تحليلها بدقة في كروت التحليل والمقايسة التثمينية.

🔹 أمثلة على التكاليف المباشرة في المقاولات:

الخامات: مثل الحديد، الأسمنت، الرمل، الزلط، الطوب... إلخ.

الأجور المباشرة: أجور العمال والفنيين اللي شغالين في موقع المشروع.

الإيجارات الخاصة بالمعدات داخل المشروع: زي تأجير الحفار أو الخلاطة لاستخدامها داخل المشروع فقط.

نقل الخامات للموقع: لو النقل خاص بمشروع بعينه.

المقاولين الباطن: إذا كان التعاقد مع الباطن لمشروع محدد.

✅ باختصار: أي تكلفة نقدر نربطها بشكل مباشر وواضح ببند أو مشروع معين، تعتبر تكلفة مباشرة.

✅ التكاليف غير المباشرة (Indirect Costs)
هي التكاليف اللي لا يمكن تحميلها على مشروع معين بشكل مباشر، لكنها ضرورية لتنفيذ الأعمال، وبيتم توزيعها على المشروعات باستخدام أسس معينة

🔹 أمثلة على التكاليف غير المباشرة في المقاولات:
رواتب وإجور الإداريين والمهندسين المشرفين اللي بيشرفوا على كذا مشروع.

إيجارات معدات تستخدم في أكثر من مشروع أو محملة على الورشة المركزية.

تكاليف الإدارة العامة: مثل الرواتب، الكهرباء، الاتصالات، ومصاريف المكتب الرئيسي.

مصروفات الموقع غير المباشرة: زي الحراسة، المولدات، دورات المياه، وغيرها.

مصروفات النقل العامة: لما تكون السيارات والمعدات بتخدم أكتر من موقع.

الإهلاكات: زي إهلاك المعدات أو المباني الإدارية.

❗ التكاليف غير المباشرة لازم تتحسب وتتوزع بدقة علشان نقدر نوصل لتكلفة فعلية حقيقية لكل مشروع، خصوصًا في الشركات اللي عندها أكتر من مشروع شغال في نفس الوقت.

📌 ليه مهم نفصل بين التكاليف المباشرة والغير مباشرة؟
1- علشان نعرف تكلفة كل مشروع بشكل حقيقي و نقيّم أداء المشروع ونحسب الربحية.
2- علشان نتابع انحرافات التكاليف (الفرق بين المخطط والفعلي).
3- علشان إعداد عروض أسعار دقيقة للمشروعات الجديدة.

#محاسبين

16/04/2025

💰 ايه الفرق بين الربح المحاسبي والربح الضريبي ؟
Accounting Profit vs Taxable Profit

لو بتشتغل محاسب، فمهم جداً تفرق بين نوعين من الأرباح:
📌 الربح المحاسبي
وهو الربح اللي بيظهر في القوائم المالية، وبيتحدد على أساس المعايير المحاسبية فى الدولة اللى بتشغل فيها.
✅ بيعكس الأداء المالي الحقيقي للشركة.
✅ بيعتمد على الاستحقاق (Accrual Basis).
✅ بيتضمن مصروفات غير معترف بيها ضريبياً أحياناً، زي مثلاً:
ـ الإهلاكات المحاسبية (مش بالضرورة تكون زي الضريبية أحيانا نسب الاهلاك الضريبي بتختلف)
ـ المخصصات
ـ الغرامات والعقوبات وغيرها ...
أما بقى
📌 الربح الضريبي (Taxable Profit)
وده الربح اللي بتعترف بيه مصلحة الضرائب، وبيتحدد على أساس القانون الضريبي.
✅ بيبدأ من الربح المحاسبي، وبنضيف أو نخصم منه بنود معينة حسب قانون الضريبة فى الدولة.
✅ يعني:
الربح الضريبي = الربح المحاسبي ± فروق دائمة ومؤقتة

📊 طيب إيه اللي بيترتب على الفرق ده؟

بتظهر عندنا حاجة اسمها:
🔹 أصل ضريبي مؤجل (Deferred Tax Asset)
🔹 التزام ضريبي مؤجل (Deferred Tax Liability)

ودي بتعكس الفرق بين المعالجة المحاسبية والضريبية لنفس البند، وبتتسجل في قائمة المركز المالي (Statement of Financial Position).

📌 مثال بسيط:
لو الشركة حسبت إهلاك محاسبي بـ 100,000 جنيه، لكن الضريبة اعترفت بإهلاك 150,000 جنيه، يبقى فيه فرق مؤقت ممكن يؤدي إلى أصل ضريبي مؤجل.

#محاسبة #ضرائب

15/04/2025

ايه الفرق بين المصروفات الإيرادية (Revenue Expenses) و المصروفات الرأسمالية (Capital Expenses)؟

في البداية، لازم نفهم معنى المصروف (Expense): هو أي نفقة بتتدفع بهدف الحصول على إيراد (Revenue). يعني مثلاً:

لو دفعت إيجار (Rent) محل، فإنت بتدفع علشان تبيع منه وتحصل على إيراد.

لو دفعت أجور ومرتبات (Salaries & Wages) للموظفين، فإنت بتدفع علشان يشتغلوا ويحققوا لك الإيرادات.

في عندنا نوعين من المصروفات: المصروفات الإيرادية و المصروفات الرأسمالية.

المصروفات الإيرادية (Revenue Expenses) هي المصروفات اللي بتحقق الإيراد (Revenue) في نفس السنة المالية. يعني مثلاً:

أجور ومرتبات (Salaries & Wages): إنت بتدفع لهم كل شهر علشان يشتغلوا في نفس الشهر ويدخلوا إيراد للمنشأة. إذن، دي مصاريف إيرادية (Revenue Expenses).

المصروفات الرأسمالية (Capital Expenses) هي المصروفات اللي بتحقق الإيراد (Revenue) على مدى عدة سنوات مالية، وبتساهم في زيادة الطاقة الإنتاجية (Production Capacity) للمنشأة. يعني مثلاً:

لو عملت حملة دعاية (Advertising Campaign) ضخمة، الشركة استفادت منها على مدار عدة سنوات. هذي الحملة ساعدت في زيادة الإيرادات (Revenues) بشكل متتابع، وبالتالي المصروف ده بيكون رأسمالي (Capital).

كمان، لو عملنا صيانة (Maintenance) للآلات والمعدات بهدف تحسين الأداء، زي زيادة الإنتاج من 10 وحدات إلى 15 وحدة، ده مصروف رأسمالي (Capital Expense)، لأنه مش هينعكس على الإيرادات في سنة واحدة فقط، بل هيستمر لفترات مالية طويلة.

في النهاية، المصروفات الإيرادية (Revenue Expenses) بتكون مرتبطة بتحقيق الإيرادات (Revenue) في نفس الفترة، بينما المصروفات الرأسمالية (Capital Expenses) بتساهم في زيادة الطاقة الإنتاجية (Production Capacity) للمنشأة وتحقيق الإيرادات (Revenues) على مدى فترة أطول.

👨‍💼 لو تقدر تقولنا أمثلة تانية على المصروفات الإيرادية أو الرأسمالية ؟ اكتبلنا في التعليقات!

#محاسبة #مصروفات #إيراد #محاسب

15/04/2025

🔧 إزاي بنستبعد الأصول الثابتة؟
Disposal of Fixed Assets

استبعاد الأصل الثابت يعني خروجه من الدفاتر، وده بيحصل في الحالات دي:

1️⃣ بيع الأصل
2️⃣ تخريده (Scrapping)
3️⃣ عدم وجود أي منافع اقتصادية مستقبلية منه

📊 وعند بيع الأصل، بيكون عندنا 3 سيناريوهات مختلفة حسب السعر اللي اتباع به الأصل مقارنة بقيمته الدفترية:

✅ الحالة 1: بيع الأصل بنفس قيمته الدفترية (No Gain or Loss)
📌 مثال:
قيمة الأصل = 100,000 ج
مجمع الإهلاك = 80,000 ج
سعر البيع = 20,000 ج
القيمة الدفترية = 100,000 - 80,000 = 20,000 ج

📘 القيد المحاسبي:
من مذكورين:
80,000 حـ/ مجمع الإهلاك (Accumulated Depreciation)
20,000 حـ/ النقدية (Cash)
إلى حـ/ الأصل الثابت (Fixed Asset) 100,000

❌ الحالة 2: البيع بأقل من القيمة الدفترية (Capital Loss)
📌 مثال:
سعر البيع = 10,000 ج
القيمة الدفترية = 20,000 ج
🔻 فى الحالة دي بيكون عندنا خسارة رأسمالية = 10,000 ج

📘 القيد المحاسبي:
من مذكورين:
80,000 حـ/ مجمع الإهلاك
10,000 حـ/ النقدية
10,000 حـ/ خسائر رأسمالية (Capital Loss)
إلى حـ/ الأصل الثابت 100,000

✅ الحالة 3: البيع بأعلى من القيمة الدفترية (Capital Gain)
📌 مثال:
سعر البيع = 30,000 ج
القيمة الدفترية = 20,000 ج
فى الحالة دي بيكون عندنا ربح رأسمالي = 10,000 ج

📘 القيد المحاسبي:
من مذكورين:
80,000 حـ/ مجمع الإهلاك
30,000 حـ/ النقدية
إلى حـ/ الأصل الثابت 100,000
إلى حـ/ أرباح رأسمالية (Capital Gain) 10,000
📍 خلي بالك أن:
المكاسب أو الخسائر الناتجة عن استبعاد الأصل بيتم عرضها في قائمة الدخل (Income Statement) تحت بند الأرباح أو الخسائر الأخرى.

#محاسبين

14/04/2025

💬 يعني إيه مخصص؟ وإيه هي أنواعه؟

المخصص - Provision
هو مبلغ بيتم اقتطاعه من الأرباح علشان نغطي به خسائر أو التزامات محتملة أو مؤكدة في المستقبل، بس مش معروف قيمتها بشكل دقيق أو توقيتها بالتحديد، وده طبقًا لمعيار IAS 37 - Provisions, Contingent Liabilities and Contingent Assets.

🔸 ببساطة كده: بنحسبه احتياطيًا علشان نكون جاهزين لمصاريف أو خسائر ممكن تحصل، بس مش عارفين إمتى بالضبط.

🔹 أنواع المخصصات:

1️⃣ مخصصات متعلقة بأصول المنشأة:
مخصص إهلاك الأصول الثابتة
⚙️ بيعبر عن انخفاض قيمة الأصول على مدار عمرها الإنتاجي، وبيتم حسابه دوريًا عشان يعكس استهلاك الأصل.

مخصص الديون المشكوك في تحصيلها - Provision for Doubtful Debts
📉 لما يبقى عندك عملاء مش بتدفع، بنحتاط بنسبة معينة من الرصيد عشان نكون جاهزين لو حصل تعثر.

مخصص هبوط أسعار المخزون - Provision for Inventory Write-down
📦 لو قيمة المخزون السوقية بقت أقل من التكلفة، بنسجل الفرق كمخصص لأن الأصل فقد جزء من قيمته.

مخصص انخفاض الأوراق المالية - Provision for Decline in Marketable Securities
📉 بنستخدمه لو عندنا استثمارات قصيرة الأجل فقدت جزء من قيمتها السوقية.

2️⃣ مخصصات متعلقة بالتزامات المنشأة:
مخصص مكافأة نهاية الخدمة - Provision for End of Service Benefits
👷‍♂️ بيمثل المبلغ المتوقع دفعه للموظفين عند نهاية خدمتهم، وده حسب سياسة الشركة أو القوانين المحلية.

مخصص ضرائب - Provision for Income Taxes
💰 بيتم تكوينه لو لسه عندنا ضريبة عن السنة مش متسجلة أو في نزاع على قيمتها.

مخصص التأمين - Provision for Insurance Liabilities
🔒 في شركات التأمين، بيتم تكوينه عشان يغطي التزاماتها المستقبلية تجاه العملاء.

مخصص قضايا وتعويضات - Provision for Legal Claims
⚖️ لو في دعاوى قضائية ضد الشركة، حتى لو لسه الحكم ما صدرش، بنكون مخصص بناءً على التقدير القانوني.

🧾 قيد إثبات المخصص بيكون كالتالي:

من ح/ مصروف مخصص ................. (بيظهر في قائمة الدخل)
إلى ح/ مخصص ......................... (بيظهر في قائمة المركز المالي ضمن الالتزامات)
📌 خلي بالك: المخصص بيتم تكوينه قبل توزيع الأرباح، بعكس الاحتياطي اللي بيتكون من الأرباح بعد التوزيع، وكل واحد ليه هدف مختلف.

⁉️ قولنا لو بتشتغل في شركة فيها عملاء كتير وبتبيع بالأجل، هل شايف إن لازم تعمل مخصص ديون مشكوك فيها؟ وليه؟ شاركنا رأيك👇

#المخصصات

14/04/2025

هل إيجار المستودع/ المخزن بيدخل ضمن تكلفة المخزون؟

الإجابة باختصار:
❌ مش دايمًا… وده حسب الغرض من التخزين ونوع النشاط.

🔍 خلينا نفهم الموضوع خطوة بخطوة:

✅ أولًا: إيه هي تكلفة المخزون؟
Cost of Inventory حسب معيار IAS 2 - Inventories
هي كل التكاليف اللي بتتتصرف علشان المنتج يكون جاهز للبيع.

💰 و بتشمل:

1️⃣ في المنشآت التجارية (Trading Companies):
تكاليف الشراء (Purchase Costs):
زي سعر الشراء + الرسوم الجمركية + مصاريف النقل +و أي مصروف مباشر لحد ما المخزون يوصل المخزن.

2️⃣ في المنشآت الصناعية (Manufacturing Companies):
التكاليف الصناعية المباشرة وغير المباشرة (Direct & Indirect Manufacturing Costs)
🔹 تكلفة المواد الخام
🔹 الأجور المباشرة
🔹 التكاليف الصناعية غير المباشرة (ثابتة ومتغيرة)

❌ طيب إيه اللي ما يدخلش ضمن تكلفة المخزون؟
🔸 التالف غير الطبيعي – Abnormal Wastage
↩️ بيتسجل كمصروف في قائمة الدخل مباشرة.

🔸 المصاريف الإدارية والتسويقية – Administrative & Selling Expenses
↩️ ما لم تكن مرتبطة مباشرة بالإنتاج.

🔸 مصاريف الاقتراض – Borrowing Costs
↩️ لا تُضاف لتكلفة المخزون إلا في حالات نادرة (زي المشاريع العقارية طويلة الأجل – حسب معيار IAS 23).

❓ طيب نرجع للسؤال: هل إيجار المستودع يدخل ضمن تكلفة المخزون؟
🟢 يدخل ضمن التكلفة فقط إذا كان التخزين جزء من عملية الإنتاج (ضروري لاتمام عملية الانتاج زي ان بعض المنتجات يلزمها ظروف تخزين معينة والا هيحصلها تلف.
🔴 لكن لو التخزين بعد الإنتاج أو للتسويق، فبيكون مصروف تشغيلي (Operating Expense).

📌 مثال تطبيقي:
شركة بتنتج مواد غذائية، وبتخزن المنتج الجاهز في مستودع مركزي لعدة شهور قبل ما يتم بيعه. هنا إيجار المستودع ما يدخلش في تكلفة المخزون، لكن يُسجل كمصروف تشغيلي في قائمة الدخل.

#المخزون

13/04/2025

ايه الفرق بين الإهلاك و الإستهلاك؟

ببساطة، الفرق بين الاثنين بيكون في نوع الأصل اللي بيتم استهلاكه أو إهلاكه. تعالوا نشوف كل واحد فيهم بشكل أوضح:

🔹 الإهلاك (Depreciation):
هو النقص التدريجي في قيمة الأصل الثابت المادي، زي الآلات، السيارات، المباني، وكل حاجة ملموسة بتستخدمها المنشأة.

الإهلاك بيظهر كمصروف في قائمة الدخل (Income Statement) ويتم حسابه على أساس سنوي، يعني بيتم تخصيص نسبة معينة من تكلفة الأصل كل سنة.

مثال: لو عندك سيارة قيمتها 100,000 جنيه وهتستمر معك لمدة 5 سنوات، فهتخصم جزء من قيمتها كل سنة في حساب الإهلاك.

🔹 الإستهلاك (Amortization):
هو النقص التدريجي في قيمة الأصل الغير ملموس، يعني الأصول اللي ما نقدرش نمسكها زي الشهرة (Goodwill)، براءة الإختراع (Patents)

الإستهلاك يتم بنفس الطريقة لكن على الأصول الغير ملموسة، وبيتم تخصيصه على فترات معينة زي الإهلاك.

مثال: لو دفعت 500,000 جنيه علشان تحصل على براءة اختراع، هتقوم بتوزيع تكلفة البراءة على سنوات معينة من عمر البراءة، بدل ما تخصمها مرة واحدة.

في النهاية، الإهلاك بيخص الأصول الملموسة، والإستهلاك بيخص الأصول الغير ملموسة، وبيتم خصمهم كمصروفات على مدى الزمن في القوائم المالية.

#محاسبة #إهلاك #إستهلاك #المحاسب &D

13/04/2025

بعض الشركات، للأسف، بتطلب توقيعك على إيصال أمانة كضمان على العهدة!
وده تصرف غير مهني ومرفوض تمامًا لأنه ممكن يستخدم ضدك في أي وقت بشكل غير عادل.
استلام العهدة = مسؤولية كبيرة!
بس كمان لازم يكون ليها إجراءات واضحة علشان تحمي نفسك
لو رايح تستلم شغل جديد. ركّز في النقاط دي كويس:

📦 أولًا: استلام المخزن

✅لازم تتكوّن لجنة جرد تراجع فعليًا كل صنف من أصناف المخزون

✅ بيتم إعداد محضر جرد مخزون موضح فيه الكميات الفعلية وتواريخ الصلاحية لو منتجات ليها صلاحية وبتوقع عليه انت واللجنة

✅المحضر ده هو المستند الرسمي اللي بيأكد إن البضاعة دي أصبحت ضمن مسؤوليتك

💰 ثانيًا: استلام خزينة

✅ هنا بتراجع النقدية الفعلية داخل الخزنة والشيكات (سواء تحت التحصيل أو لأمر الغير)

✅ بيتم توثيق الكلام ده في محضر استلام خزنة بتاريخ بداية استلامك للعمل.

✅ المحضر ده مهم جدًا لأنه بيحدد الرصيد اللي انت بدأت عليه، وبيحميك من أي مسؤولية عن فروقات أو مشاكل سابقة لتاريخ الاستلام.

📌 لو صمموا معاك على كده:

اعتذر بكل احترام ووضح إنك على استعداد تمضي على محضر استلام عهدة رسمي لكن إيصال الأمانة مكانه مش في بيئة عمل محترفة، بل بيعتبرك متهم مش موظف!

📌 خلاصة الكلام:
وقع على محاضر رسمية، وخليك دايمًا واضح ومرتب في استلامك للشغل.
ومتوافقش أبدًا على حاجة ممكن ترجع تضرّك لاحقًا.

💬 سؤال للمحاسبين:
هل اتطلب منك قبل كده تمضي على إيصال أمانة؟ عملت إيه وقتها؟
اكتبلنا تجربتك في الكومنتات.

13/04/2025

🎯 يعني إيه نقطة التعادل؟
إحنا كمحاسبين دايمًا بيهمّنا نعرف الشركة بتكسب ولا بتخسر.
لكن الأهم أحيانًا، هو اننا نعرف:
📍 عند أي نقطة تحديدًا الشركة "لا بتكسب ولا بتخسر"؟

النقطة دي اسمها:
📊 نقطة التعادل – Break Even Point (BEP)
وهي ببساطة:

الكمية أو قيمة المبيعات اللي تغطي كل التكاليف الثابتة والمتغيرة بدون ما تحقق ربح أو خسارة.

💡 ازاي نحسب نقطة التعادل؟

📌 نقطة التعادل بالوحدات = التكاليف الثابتة / هامش المساهمة للوحدة
Break Even Point (Units) = Fixed Costs / Contribution Margin per Unit

📌 وعلشان نجيب هامش المساهمة (Contribution Margin)
بنلاقى ان :
هامش المساهمة للوحدة = سعر بيع الوحدة – التكلفة المتغيرة للوحدة
Contribution Margin per Unit = Selling Price – Variable Cost

🎯 ناخد مثال علشان نفهم أكثر :
لو بتبيع منتج بـ 100 جنيه، وتكلفته المتغيرة 60 جنيه،
وهامش المساهمة = 100 - 60 = 40 جنيه
ولو التكاليف الثابتة للشركة = 20,000 جنيه
يبقى:
نقطة التعادل = 20,000 / 40 = 500 وحدة

يعني لازم تبيع 500 وحدة علشان توصل لنقطة التعادل .

هل اشتغلت قبل كده على حساب نقطة التعادل لمنتج أو مشروع؟

13/04/2025

📊 القوائم المالية في شكلها الكامل طبقاً لمعايير IFRS

كل شركة مُلزمة بإعداد قوائم مالية تعكس حالتها المالية بدقة وشفافية، وطبقاً للمعايير الدولية للتقارير المالية IFRS، فالقوائم المالية بتتكوّن من 5 عناصر أساسية:

1️⃣ قائمة المركز المالي
📌 Statement of Financial Position
ودي بتوضح أصول والتزامات وحقوق ملكية الشركة في لحظة زمنية محددة.

2️⃣ قائمة الدخل & قائمة الدخل الشامل
📌 Income Statement & Statement of Comprehensive Income
القائمة دي بتعرض نتائج أعمال الشركة من ربح أو خسارة، وكمان أي عناصر دخل شامل أخرى.

3️⃣ قائمة التغير في حقوق الملكية
📌 Statement of Changes in Equity
بتوضح الحركات اللي حصلت في حقوق الملكية خلال الفترة، زي الأرباح المحتجزة أو التوزيعات.

4️⃣ قائمة التدفقات النقدية
📌 Statement of Cash Flows
قائمة مهمة بتوضح مصادر واستخدامات النقدية، سواء من الأنشطة التشغيلية أو الاستثمارية أو التمويلية.

5️⃣ الإيضاحات المتممة للقوائم
📌 Notes
ودي جزء لا يتجزأ من القوائم، بتشرح السياسات المحاسبية والأرقام المعروضة بالتفصيل.

لو حابب تفهم كل قائمة بالتفصيل وبأمثلة واقعية، تابعنا .....

#محاسبة

12/04/2025

👨‍💻 لو لسه بادئ طريقك كمحاسب.. النصايح دي ليك 👇

المحاسبة مش حفظ، ومش مجرد شغل روتيني، دي مهنة بتعتمد على الفهم، والتحليل، والتطبيق العملي.
علشان كده لو إنت محاسب جديد أو لسه بتبدأ تتعلم، ركّز على النقط دي كويس:

1️⃣ افهم قبل ما تحفظ
ابدأ بفهم مراحل الدورة المحاسبية بالكامل، من تسجيل القيود لحد إعداد القوائم المالية.
واقرأ واتعلم من كذا مصدر علشان توصل للفهم الحقيقي.

2️⃣ طبّق دايما كل اللى اتعلمته بشكل عملي
افترض إن عندك مشروع صغير ولكن مشروع تجاري، وابدأ بتسجيل قيوده كأنك المحاسب بتاعه.
التطبيق العملي هيساعدك تفهم المحاسبة أسرع.

3️⃣ راجع معلوماتك باستمرار
أي جزئية تحس إنك نسيتها، راجعها فورًا، وخلّي عندك ملف صغير تجمع فيه المفاهيم اللي محتاج ترجعلها من وقت للتاني.

4️⃣ اتعلم Excel باحتراف
برنامج Excel هو سلاح المحاسب، فلازم تبقى سريع ومحترف في استخدامه، خصوصًا في الـ functions، pivot tables، والتقارير.

5️⃣ قوّي اللغة الإنجليزية بتاعتك
أغلب المصطلحات المحاسبية هتقابلها بالإنجليزي، وكل ما لغتك تقوى، فرصك في الشغل هتكون أقوى.

6️⃣ حدّد مسارك المهني من بدري
هتكمل كمحاسب؟ ولا ناوي تشتغل في المراجعة؟
كل مسار ليه متطلبات مختلفة، فحدده بدري واشتغل على نفسك فيه.

7️⃣ نظّم وقتك
استغل وقتك في انك تتعلم، وخطط ليومك، ولو عندك وقت فراغ استغل الوقت دا في تطوير مهارة أو مراجعة معلومة.

8️⃣ اتعامل مع زملائك باحترام
حتى لو سيبت المكان اللي شغال فيه، العلاقات الطيبة بتفرق جدًا، وبتفتحلك فرص في المستقبل.

لو عندك نصيحة لأي محاسب لسه في بداية الطريق.. اكتبها في كومنت 👇
خلينا نساعد بعض!

منصة مُبادر التعليمية - محاسبة وأكثر

23/04/2025

16/04/2025

16/04/2025

15/04/2025

15/04/2025

14/04/2025

14/04/2025

13/04/2025

13/04/2025

13/04/2025

13/04/2025

12/04/2025

Address

Website

Alerts

Shortcuts

Share

Category